Romanes

Vorbisaripe Bordás Péter basszusgitaroshosa, kon jekh tashkasa pihrdas ande o Franciako them.

2014. május 5. | Forgács Marietta

Muro papo primashi sas. Karing panzh bershengo somas, kana dasma jekh shukar cigni lavuta, ke kodo sas muro orokshego. Muro phral las, thaj inke pe kodo dyes mardas pe muro shero. Sar von phendine, but kerdine misto le zhenenge… – phenel lashe vojasa Bordás Péter basszusgitároshi, kana kodo pushelm, so xutyildas peske nepostar. – Kade, palpale te dikhav, vi me kade gindij. No, so te phanav inke pa mande? Akanak chaches pa kodo vorbij tuke, hoj kaj rakhadyilem, thaj kade majdur?

Interesnijma, te chi bunus.

No. mishtoj. Pe Kazincbarcika rakhadyilem, ande jekh tradicionalisho bashavari romani familija. Mure papura bashadine, de mure duj phrala aba chi kerdyile muzhikusha.

Pe jekh telelepo barardan opre?

Na. Ame majfeder mashkar le gazhe beshlam.

Tyiro dad, thaj tyiri dej kamlas kade?

Chi patyav, varisar kade avilas. Kana mucindam, vi atunchi but rom trajindas pe Hajdúnánás, de ame na lenca beshlam. Ando kalsso, kaj phirdem ande shkola, majfeder gazhenge shavora phirdas.

Kanagodi kamlan te bashaves?

Na! De kana avri gindindem, hoj pe gitara kamav te khelav, kodo jekh kasavo dyes sas ande muro trajo, so chikana chi bristrav. Khere dikhlam o tevevo, muro dad, muri dej, thaj me. jekh jazz koncerto gelas, thaj jekh rterno shavo kade khaldas pesko gitaro sar jekh virtuozi. Kado bares fajindasma, thaj khatar kodo dyes zhanglem, vi mange kado trubuj te kerav, khanchi kaver. Chi trubundas te nachol chi jekh kurko, thaj muro dad kindas mange jekh gitari. bares patyajline ande mande, thaj vi akanak. – asal pes.

Kon-i kodole zhene save legmajfontosha tuke?

sar trubunos, muro dad, thaj muri dej. Von vi akanak khetane trajonm thaj chi na zhanos te gindij, hoj kado varikana kaver shaj avla. Von kanagodi patyajline ande mande, thaj zoör dine mange. Thaj e cigni Róza, mure phraleski shej, kasa bares mishto avri avas. Pherde si trajosa, vojasa.

Zhas palpale kaj e muzhika. Kastar sityilan te kheles po gitari?

Anglunovar korkorro sityilem, thaj maj pala kodo gelemtar ande Debrecena ande jekh gitaraki shkola, de pala jekh bersh aba chi zhangline nevo te sikaven mange. Erdekesho booldipe le trajoske, hoj majpalal kothe gelem palpale te sityarav. No, na lungo vrama, numa jekh dyes inkerdas o sityaripe.

Avri shudinetu?

Nais, hoj kado gindis, de nichi. Bares cerra love potyindenesas ande shkola, de zhanav te trajuvav hoj, khere mande aven le sityimaske shave, kon kamen te gitarozin.

Sar reslan ande Franciako them?

Jekh amal akhardas, hoj oe duj kurke zhas avri te bashavas. De anda kadi vrama  shtar bersh kerdyilas, chacho dromipe. Kado akharav kade, hoj le bigranyicako chacho slobodipesko zumavipe. Chikana chi paruvasas kadale bersha chikhancheske, Ratyi varikah soves, detehara opre ushtyes, thaj chi zhanes hoj so keres, kaj avesa pe kaver dyesa, so xas, kaj sovesa majd, numa trajos, thaj pinzhares o trajo….

Kade hoj naj krisa, konvenciovura?

Sartena! Khanchi kontrli, numa o chacho trajo.

Anda soske love trajindine?

Nas konshtanto love, de anda legmajcerra love anda e muzhika avilas. Numa dine le manusha, ke kesave-j. Bares but love sas amenge ande kodi vrama, chi na patyasas. De ame na kesave chorre manushenge dikhlam avri, tena chche dromara, lashe gadasa, sogodesa, so trubuj kaj o lasho trajo.

Vi o kamipe pe tute rakhlas ande kodi vrama?

Nichi, ado jek kaver falo trajo, ande soste chi resen ande jekh kamipe, kaj trubul te sama te les pe jekh zhuvlyi. De kothe ande sako minuti kamimo simas ande sako zhuvlya. Bares kamav la franciake zhvlyako slobodipe, dilipe, sar dikhen pe trajo.Jokhar vi tele ashilem khatar muro gruppo misto jekh shej, Lasa sima sunyi dyesa, thaj lemma, thaj gelemtar majdur – chi zhanav, kaj – te rodav mure amalen. Pala duj kurke pe jekh stancija rodem le. Baroi sas e losh, ke telefono, kodo nas – shaj gindis, no kesavoj jekh chacho dromipe.

Chi darajlan?

Sartena. De chachikanes na, ke zhi atunchi chi simas korkorro, maladyilem kaver zhenenca. Lungo vrama avelas, te phenos tuke, ke sako dyes variso nevi traba avilas.

Thaj so andas tut khere?

Muri dej aba chi birindas muro trajo, thaj khere akhardasma. Varikana ande 2001-to bersh avilem khere. Datunchara bashavav khere, de sima chachi butyi: portashi sim (asal). Lasho than, ke sima vrama te sityuvav. Angolicko, franciako shib.

Thaj ratyi zhas te kheles, mishto gindij? Ande soske formaciovura kheles?

Karing panzh bersha sim ande jekh romano gruppo, angla kado numa pop, rock, thaj jazz zumademma avri. O hirsho XL Sisters gruppo simas anglunovar, thaj vi le Demjén Rózsesa gelem pe koncertura te khelav ande lesko gruppo. Kado bari butyi sas inke varikanak vi mange, kade hoj numa bish bershengo terno shavo simas. La Vojasa grupposa, ande Denada, thaj ande Delalamm gruppo sim gitaroshi, thaj inke Kettős Tamásosa, thaj le Vad Szamarak grupposa zumdas. Adyes aba butfale muzhika trubuj te pinzharav thaj vi ande te sikavav.

Kade dikhav, hoj majna sogodi zhanes te mukes tutar: tham, familija, amala, kamipe, de e muzhika kajgodi zhal tusa khetane.

Ova. E muzhika anda kodo trubundas, ke pe jekh rig ande phandelma pe jekh than, so numa muroj, de pe kaver rig apal avri putrel jekh vudar ande muzhikaki luma, bivorbake. nashtig phenav vorbasa, so kadalesa phirel: ratyi, thaj arat trajuvav mure amalenca, pas mulatinas, boldas kerav sosogi, sar le sakodyeske, „lashe” manusha.

Chi kames le lashe manushesko trajo te trajos?

Varikaj pe mashkar kamos te tordyuvav. De kade, lokes, pasha o shtarvardesh bersh, majbutvar ande muri godyi avel e familija, le cigne shavora, o kampie, thaj but kesave trabi.

Kade hatyarav, sar ekh cerra zavarij tut kadi tema….

Ekh cheppo chachipe situ. Me nke chikana chi malaydilem ashasa, sar jekh chacho randivo, de hajkam inke shaj avela. Kamos shoavoren, tromnyasa, familijasa, kheresa khetane, de pe  Toulon bare pajeski dolma. Zhanes ma chachikanes franciako manush sim, na ungriko manush, kado hatyarav.

Zhasas aba palpale?

Ova, bares kamav. Akanak kade dichol, hoj septemberesko agor vi zhav.

Pale kodi situacia avla, sar dulmut: trajos le minuteske?

Nichi. Kodo kamos, so zhi akanak butyi kerdem, sityilem, kothe te del avri leski potyin. Demovura las opre ande Parizs, thaj bashavas kajgodi, majfeder pe bare pajeski dolma.

Thaj o kamipe…..

Sartena, kamipe rodav. Kanagodi romantikusho manush simas. De av, zhas aba!

Lokes zhastar, cirdel pesa. trin zhene sam, Péter, lesko gitaro, thaj me. Vojasa phirkeras pe Margit vulyica, karing o 4-to villamoshi, thaj inke vi kodo chi zavaraij ame, kana o villamoshi somosarel, hok ande pesko drom tordyuvas.

További cikkek a rovatból
Amende pe angluno than si: Budai Zsanett, kon e Aldi zhuvlyaki romnyi kamlas te avel Amende pe angluno than si: Budai Zsanett, kon e Aldi zhuvlyaki romnyi kamlas te avel
Ande peske bishe bersha phirel e shukar romani shej, kon bares kamel te kiravel, thaj but kurke pe kodo sas, hoj voj te avla e angluni le Aldi boltake romnyake. Sunusaras, ba na la alosardine le zhene, de vi kade chi bunul, hoj zumadas ando tevevo. Voj kade dikhel pe peste, sar jekh edyseruvno, gavutni shej, kon akanak ande Peshta kerel butyi sar sociologushi. Kathe majna pale trubundas te pinzharel pesko romanipe, de pinzhardas vi bute romane iskiritorenca, makharenca, godyaver manushenca. Loshal peske trajoske, zhukarel hoj inke soske butya trubul te lasharel, kade ande cerra vrama zhal pesko internetosko blogo, kaj romane xabe sikavel ande.
Zibano ande khanci Zibano ande khanci
Sas jokhvar jekh cigno grupporo, kon ande bari butyi linepe. Kodo gindinde, pa kdo virbina maj – khelipesa te sikaven -, pa soste le legmajbut zhene chi vorbon, vaj chi na zhanen khanchi pe kadi traba. Pa but thana avile kodol zhene, save rom, ungro, biboldo, khelara, gilyara, shavora khetane xutyildine, hoj po holokauszt (= porrajmos – le romen butyako- thaj xasajipesko legeri ingerdine) te seronpe.
Pala lende mukline o telepo
Tela efta bersh karing deshupanzh miji romengi situacia kerdyilas majlashi nais le teleposko opre dyinipesko programoske. Pe majbut than, kaj shtartolindas, le gazhe chi dikhline vojasa. Vi kado sas ande Tolna thaj ande Baranya medya, de sar gelas e vrama le gazhe majpalal avri aviline le romenca ande kadal gava.
Butyi thaj marno! Butyi thaj marno!
Bohkajipesko zhalipe shtartolindas khatar e Mishkolca zhi o Parlamento phujatar ande soste chorre, bokhale bibutyenge manusha zhan. Kaj o gruppo majbut foroske raja tordyindas kothe, kade phendine avri, hoj vi von kamen te boldaren o trajo. Misto le adovura phares trajon le cegura, thaj butyi naj ande le chorre gava.
“Pala shel bersh avla majlasho kodol kampanyi, so akanak keren angla o diskriminaciovo“ “Pala shel bersh avla majlasho kodol kampanyi, so akanak keren angla o diskriminaciovo“
Andi oficija, kaj o Ciprian Necula kerel butyi, pe sako than si variso andi soba: kucha, hajina, notebook, lyuvava, thaj but-but dulmutane trabi. “nashtig pav kathe thuvali” – phenel sar beshel kaj e mesalya, thaj peski faca buzhangli asajimo si. Pala kado sigo opre lel jekh lyuvava, thaj lelpe the phabarel. Pe pesko gad o Gogol Bordello si, na ande rajkane gada si opre urade. Sar kothe beshel le manusheske voja avelé te vorbisarel lesa.
Trajo ande murmunci Trajo ande murmunci
Andej Amerika pe kadal dyesa anda dudum kerde lampa, guglenca, thaj mashkara si. Amenda apal ande le zhene aven thaj zhan ande murmunci, memelyi phabaren, thaj duma den pa amare mule. Pinzharde rom pushlam, hoj lenge so jelentij le mulengo dyes, thaj kipura, muzhika, thaj filmosko kotor imbisaras.
Romani shtrategia thaj csehicko gruppo
Pala Balog Zoltán politikusheske bare vorba lashi muzhika shaj ashundam khatar jekh csehicko grupo, khatar o Gipsy.cz. Vi shaj zhanglamas, hoj ando Csehicko them chi kamen e romani muzhika, de vi kade o legmajfavoritno gruppo ande pengo them.
Blogok
Nótár Ilona blogja
És változunk Idősíkok között
Bogdán Péter blogja
Megmaradunk egymásnak örökre! Egy kisvárdi jány

Támogassa a Sosinet.hu-t!
Ajánló
1/3
Kövess minket
Partnereink
Támogatóink